二零零六年四月十五日，包括我在內嘅 F4 成員，同阿苗、Ronald，去咗廣州，食盡羊城一切嘅羊！

呢個旅行已經策劃咗好耐，原本完美嘅 plan 係噤，不過世事難料，好多嘢 plan 嗰時好完美，但係……

得到好心人 Dicky 嘅相助，我同佢七點半已經到咗紅火，諗住買之後兩班嘅 T828 實十拿九穩，
點知賣晒。

成個 plan 即刻亂晒陣腳，點搞？皮質醇立時標升，好想發老牌。

「停一停，想一想。」

今趟個 trip 嘅期望係「食」同 enjoy，跟唔到個 plan 啫，又唔駛死嘅，千祈唔好 miss the point。

同 Dicky 講好咗買完飛就 QT ，噤買唔到飛都冇理由唔 QT 咖。
平時經常世務纏身嘅我，今日決定唔可以俾任何事情影響我同神嘅時間。
於是一於話知佢死，去老麥食早餐 QT。

當我哋到咗老麥坐低一陣，阿苗都到埋，於是三個人一齊 QT。

Ronald 都喺原定集合時間（八點半）到達，我哋按計劃一齊祈禱。

祈完禱之後，我問咗佢哋一個問題：大家今日有乜期望？

原來大家嘅期望比我仲要簡單，我嘅期望係「食」同 enjoy，而大家嘅期望就只有「食」！

Very good！噤就 easy 得多，我即刻乜嘢壓力都冇晒。由嗰一刻開始，我決定將個 plan 「放埋一邊」。

不過，Henry 同大佬喺之前一日已經去咗深圳過夜，佢哋一早買咗車飛，
預啱時間到廣州 meet 我哋班直通車，而家坐唔到直通車，唯有叫佢哋喺廣州等等我哋……

乜都安排好晒之後，就坐東鐵去深圳。
人真係幾多，不過過關都算快，沿途我哋都同阿苗講笑，時間過得好快。

我哋好好彩買到十二點到廣州嘅飛，原本打算企位搭之前一班，但賣飛嗰個話今日人太多未必俾企。
Fine！噤就唔駛諗噤多囉，一於享受一下嚟緊嘅一小時火車旅程。
十二點到，都係比個 plan 慢一粒鐘，算係不幸中之大幸啦！（心諗）

好！到月台喇。我哋坐嘅係藍箭，大家好期待。

平平安安上到車，大家都喜上眉梢。

我哋不停講笑，仲逼阿苗扮「低V RAIN」！

遠眺沿途風光嘅阿苗

呢架又殘又舊嘅藍箭，平安地將我哋送到廣州東站。

我哋喺廣州東站同大佬、Henry會合，總算人齊喇。
經商議後我哋決定將個 plan 再改一下，買最後一班直通車返香港。
噤樣做嘅話，雖然我哋遲咗一個鐘頭到，但係坐直通車又可以遲一個鐘頭走，
所以到目前為止，將個 plan 順延一個鐘，應該仲可以繼續執行。

我哋買咗飛之後，按計劃坐 233 去小北花圈。

到咗小北花圈，阿苗話要了解當地文化，所以一路行，一路影。

呢張相嘅標題係：「阿苗帶你食阿塞拜疆菜」！

去小北花圈做乜？其實目的只有一個，就係去斯木拉麗‧巴庫‧阿塞拜疆餐廳食阿塞拜疆菜。

可以講多少少，其實發現斯木拉麗係單憑佢個獨特嘅招牌。
話說有晚小弟放工後坐 233 去回民飯店食晚飯，當架巴士去到小北花圈嘅時候，
忽然見到一個只有英文，冇中文嘅招牌，個招牌就係上面張相嗰個。
紅底白字的招牌，後面係燈箱，夜晚著晒燈之後，
AZERBAIJAN 個字十分搶眼，我一見到 AZERBAIJAN ，就決定點都要試一次。
試過之後，發覺認真正斗， 點都要帶班 friend 嚟拆番餐。

如果冇發現斯木拉麗，我未必會搞團去廣州。

好喇，講完故仔，講吓斯木拉麗有乜好嘢食先。
※※ 注意：除特別標明外，以下所有價錢為人民幣 ※※

菜名：

價錢：30元

好味指數：8/10

第二味菜叫，即係羊湯。羊味濃沃，非常好味。圖中左上方塊黃色嘅物體係羊肥膏。 呢碗其實係人頭湯，一人一碗就要 180 蚊，我哋覺得貴，所以只係叫咗一碗。 我哋同個服務員玀碗仔分嚟飲，佢俾咗玻璃杯我哋，唔知呢個係阿塞拜疆嘅傳統，抑或係佢哋冇咁多個碗仔，不過用玻璃杯飲湯都幾 special 。

菜名：

價錢：25元

好味指數：10/10 (爆燈!!)

第三味菜叫，即係卷心菜包免治羊肉，個 feel 有啲似生菜包，但係好食過生菜包好多！ 中間嗰碗係羊乳酪，超正！我玀到部相機出嚟，碟嘢已經食剩兩件。

菜名：

價錢：30元

好味指數：9/10

第四味個樣好似糯米雞嘅菜叫，即係提子葉包免治羊肉，個 feel 都係好似生菜包，不過啲提子葉有啲苦，又有啲煙煙韌韌嘅質感，幾特別！ 中間嗰碗都係羊乳酪，超正！我玀到部相機出嚟，已經有人等唔切食咗嚿。

OK，第一回合到此，而家中場休息。

我哋大家都唔飽，決定叫多一 round，喺等緊嘅時候，大家影吓相。

值得一提嘅係我哋今餐嘅飲品：阿塞拜疆茶。
阿塞拜疆茶上次我都有飲過，我叫咗一杯，四蚊，飲落感覺同立頓紅茶冇任何分別。
今次人多，我哋叫咗一壺，十五蚊，但係啲味同我上次飲差好遠，今次啲茶有一陣香料味。
我相信我上次飲嗰杯佢落漏嘢。

至於好唔好飲？我講(寫)得太多喇，等我哋嘅旅遊王子阿苗評論一下啦！

聽完阿苗嘅心聲，再聽吓個樣有啲似中亞人嘅 Ronald 嘅評價。

順帶一提，斯木拉麗裏面嘅一切裝飾都好俄羅斯風格，老闆係阿塞拜疆人，只識講，唔識寫中文，
所以餐牌內有好多地方只有俄文。
不過店內有廣州人做侍應，有佢幫忙，我哋先識點樣點菜。

好！話咁快第二會合開始。由於唔想嚟第三會合，我哋今次點嘅菜都比較大碟，價錢亦較高。

菜名：

價錢：32元 x 2

好味指數：7/10

最後一味叫，即係普通嘅煎羊扒，但係特別在中間啲醬，有啲辣又有啲甜，都唔知係乜，不過幾好味。 由於呢碟我之前食過，覺得好正，所以今次一叫就叫咗兩份， 不過有其他菜色比較之下，反而覺得佢只係一般。

今餐 380 蚊落樓，大家食到捧住個肚。

食就食飽喇，不過有樣嘢好麻煩，就係我原本 plan 咗食一粒半鐘嘅午飯，我哋食咗成兩個半鐘。

經商議後，我哋決定唔去陳家祠，只去烈士陵園一個景點。

我哋立刻出發，坐出租車去烈士陵園。

呢個時候， Henry 忽然話想去一處唔知叫乜嘢「右路」嘅地方買相機，仲變得好積極，四處打聽。

我哋去到烈士陵園已經三點半，見到對面嘅廣場有好多人放風爭。

我哋每人俾咗三蚊入場費。烈士陵園係一處歷史名勝，身為領隊，當然有責任講解一下。
但係我見大家玩得咁開心，都係算罷啦……

唔知點解，好奇怪。每當一班人喺支棍前面影相，就一定會出現啲噤嘅嘢。

我哋行咗大半個鐘，行吓行吓又有啲心郁郁想食嘢，於是去公園裏面嘅小食亭買雪糕食。
阿苗食嘅係叫做「冷狗」嘅冰棒，而我就食五羊牌香芋味甜筒，兩樣都係廣東嘅老牌雪糕。

Henry 今日行大運，個小食亭老闆咁啱又係攝影發燒友，即刻指點迷津，
叫 Henry 去一道離烈士陵園唔遠，叫盛賢嘅地方買。

我見反正個都跟唔到個 plan ，又冇人明確表示反對，就一於順吓佢意，一齊行去盛賢。

去盛賢條路其實唔係太遠，大約由灣仔修頓行到銅鑼灣崇光。
沿途見到好多無軌電車，同埋呢款好古怪嘅巴士。

阿苗話要再了解多啲廣州文化，所以又玀走部相機一路行，一路影。

行咗大約十五分鐘左右，我哋見到盛賢，Henry 即刻話：「呢度就係我要搵嗰度喇！」
「咦？乜你唔係話叫乜乜右路嘅咩？」

喺盛賢對出，有檔新疆羊肉串燒，我哋即刻黐埋去。

Henry 自行離隊去買攝影器材，我哋就一路係咁食，一蚊串，食咗廿串。

我哋離開盛賢嘅時候已經係黃昏，已經再冇時間去天河城購物，於是決定起行直接去回民飯店食晚飯。

盛賢唔近地鐵站，我四圍打聽，發現原來有一條 104 無軌電車線去到西門口。
原來我哋有好多人未坐過無軌電車，有啲仲見都未見過，所以大家都好興奮。

平平安安，我哋到咗回民飯店，嗰時已經天黑。

回民飯店係一間賣粵菜嘅穆斯林茶樓，一般粵菜都有，但因為係穆斯林開嘅，
所以冇豬肉賣。一切與豬有關嘅菜色，都會改用牛或羊代替，因此亦成為咗佢哋嘅特色。

我哋點咗以下幾味菜色：

除咗呢幾味之外，我哋仲蒸咗條鱸魚(十蚊)，同埋炒咗碟腐乳通菜， 總共 280 蚊落樓。

食飽飯之後，我哋喺回民飯店門口影番張相留念。
嗰時已經八點半，於是即刻坐地鐵返東站。

啱啱九點前到達東站，到站內商店作最後衝刺，大家懷住依依不捨嘅心情，坐直通車返香港。

我準時十二點返到屋企，即刻上床訓覺。

雖然今日個 trip 跟唔到個 plan，但都食飽同享受夠，算唔話得啦！
最後旅費為每人港幣 380 元，比原本個 plan 仲平咗 100 元，真超值。

返回上頁 / 返回主頁