二零零六年二月十三、十四日，我同阿苗去咗馬交，過咗一個浪漫嘅情人節！？！？！
港澳碼頭內的 travelator
去程時我哋坐何生嘅波音 929 ，經過一小時嘅「飛行」，平安抵達馬交。
五花八門嘅酒店穿窿巴士
多謝澳門發達嘅賭業，而家差唔多所有酒店都提供穿窿巴士服務，而何生嗰間啲穿窿巴士仲係奔馳出品添！
我哋就喺呢度等我哋嘅酒店穿窿巴士，不過可能我哋嘅酒店冇賭場，架車同人哋嗰啲差好遠，好殘。
西望洋山的街道
我哋間酒店喺西望洋山，西望洋山係澳門嘅有＄佬區，地方好有格調，人都好少。
由於時間倘早，我哋暫時囉唔到房。放低行李喺 reception 之後，就向附近嘅聖母小教堂出發。
沿途有瞭望臺可眺望澳門同珠海。
喺聖母小教堂外，可以睇到澳門最靚嘅景：澳門旅遊塔同西灣大橋。
而教堂本身都好有特色。
之後行去附近嘅葉熾記食 lunch 。
葉熾記係地度嘅澳門式茶餐廳，內裏煙霧迷漫。
坐喺我哋對面嘅檯係一班食煙嘅學生妹，有人話澳門民風純撲，我睇都未必可以一概而論。
不過啲嘢食好好味，我哋點咗萄國雞飯 (MOP22) 同燴牛尾飯 (MOP23) 。
嗰日正值鹹潮襲澳，葉熾記嘅茶係鹹嘅。阿苗唔知，仲問人呢啲係咪一種澳門好特別嘅茶…
之後行去媽閣廟傍邊嘅海事博物館，沿途啲樓好舊，連條好啲嘅行人路都冇。
我哋路經一度叫亞婆井前地，有啲豁然開朗嘅 feel 。
基於「不与巴力打交道嘅原則」，我哋冇入媽閣廟，只喺門口影張相就算。
海事博物館內有好多展品，其中我最感興趣嘅係港澳渡輪演進呢一欄。
之後行去聖地牙哥酒店，喺附近見到呢部香港冇嘅小巴：韓國 KIA 小巴。
由古堡改建嘅聖地牙哥酒店，原本我哋打算住呢度，不過冇房。
雖然我哋冇得住，但係都好想入去睇吓。間酒店係就係好有氣派，不過好舊，好彩我哋住唔到。
之後坐 28A 去葡萄酒博物館，坐嘅係新福利超長陣 Rosa。
令人懷念嘅落車鐘
係葡萄酒博物館外嘅彎位影嘅新福利全新丹尼士飛標 Dennis Dart
葡萄酒博物館其實同賽車博物館喺同一座 building 內，
有澳門旅遊卡可半價 MOP 10 入場，喺入口有 counter 可即時申請。
賽車博物館冇乜嘢好睇，葡萄酒博物館嘅資料又略傔太多，根本無法吸收。 如果佢哋出番本書或者我會買番本返屋企慢慢睇，可惜冇。
飲醉咗嘅阿苗，click 一下可以聽吓阿苗嘅「酒後吐真言」。
不過，單係試吓飲酒都抵。
仲有一樣嘢一定要提，上次喺度買咗支 ice wine，只係 MOP168，非常好飲！
今次一於再買，阿苗唔買，我一於用埋佢個 quota，買咗兩支大，五支細。
大: MOP 168 -- 750 ml
小: MOP 20 -- 60ml
每人可帶 1000 ml 返香港，即 1 大 4 細。
八角亭係一座小型圖書館
之後行去議事亭前地，行咗好耐，好耐，又行錯………
匯業與您共創北韓繁榮？
幾經辛苦，行咗成粒鐘，先至到議事亭前地，我哋去黃枝記食蝦子麵，又貴又細碟，不過幾好味。
買咗份澳門日報，四蚊，冇嘢睇
約咗啲澳門弟兄七點喺議事亭前地麥當勞等。
趁重有時間，去附近嘅洪馨記試吓佢哋嘅手打椰子雪糕。
六蚊杯，冇乜特別。間嘢搵咗好耐，好隱敝。
仲有間嘢係賣椰子製品，唔係餐廳，冇得坐係度食。
返番去議事亭前地，華燈初上。
啲澳門弟兄好準時，又好客氣，仲請我地食飯。
我哋有好好嘅 fellowship，之後行咗一陣商場。
我靜靜雞買咗三張卡寫鼓勵俾佢哋，MOP 3.5 一張，Made in Korea.
之後弟兄 Henry 帶我哋行番酒店，途經甜香園買甜品，我冇買，因為怕肥。
返到房已經 11 點，我行到好倦，匆匆寫完三張卡就 sleep ！
其實，間房嘅 view 係一流嘅， 澳門旅遊塔加西灣大橋，堪稱全馬交最靚夜景。
可惜無暇細賞，白白浪費咗一間海景房。
BTW，我哋住嘅係濠景酒店。
喺旅行社嘅 list 上面寫住濠景(山景)同濠景(海景)，
我哋以為係兩間唔同嘅酒店，濠景(海景)貴一百蚊，諗住住豪啲，
所以 book 濠景(海景)，
點知濠景(山景)同濠景(海景)係同一座 building，
濠景(山景)係指向山嘅房，濠景(海景)係指向海嘅房，
所以早知就訂濠景(山景)算數。