逢星期二早上，係澳門弟兄一齊靈修嘅日子。
靈修嘅地點就喺我哋間酒店附近：澳門旅遊塔傍嘅南灣湖，時間係早上六點半。
熱情嘅澳門弟兄邀請我哋參加，老實講，放假真係唔想噤早起身，不過我相信如果去得到，
呢個亦係同神，以及澳門弟兄嘅一段難忘回憶。
而且，我寫咗嘅三張卡，唔襯呢個時候俾，都唔知仲有冇機會，
所以喺再三考慮下，就決定豁出去啦！
叫咗五點九 morning call，南灣湖同酒店只有五分鐘步行距離，
但係咪咪摩摩，我哋都係遲咗五分鐘先到。
一去到，已經見到一大班弟兄喺度燈前夜讀。
(因為天未光，所以佢哋玀住本 Bible，企喺街燈下面睇。)
我同阿苗喺附近搵咗張凳坐，啱啱打開 Bible，啲弟兄就叫我哋一齊 pray。
原來澳門弟兄有好多人返工要返好早，所以約六點半一齊睇 Bible，
六點九就一齊 Pray，七點左右就散 band。
阿禮帶完個好勁嘅 message 後，大家就分開祈禱。
我同阿苗、Henry 一齊企喺南灣湖上面啲木板度 pray，好正！
七點鐘左右，大家再 gather 埋一齊，認識咗大家之後，就各散東西。
之後，Henry 帶我哋去食瑪嘉烈蛋撻，聽講呢間鋪頭係兩公婆開嘅，
但係佢哋離咗婚之後，老公就去咗路環開過另一間。
我食嘅早餐係 Coke Light 加葡撻再加焗薯，好好食，正！
不過一啲都唔平，葡撻：MOP 5.5、Coke Light：MOP 6.0、焗薯：MOP30.0，
一個早餐就食咗四十一個半！
而阿苗就食咗下面舊唔知係乜嘅嘢，再加杯咖啡。
一面飲咖啡一面 QT 嘅阿苗
當我哋食到一半，有個鬼婆玀住份澳門日報搭檯，
我初初以為佢係玀份報紙嚟氈檯，點知原來佢係買嚟睇嘅。
睇咗一陣，仲有兩個中國人坐埋嚟，同個鬼婆一齊講廣東話！真係強。
之後我哋坐 28A 返酒店，同樣係新福利嘅超長陣 Rosa。
喺酒店坐咗一陣，嗰時先有機會用心去睇下個海景，不過我哋都差唔多要 check out。
Check out 後，喺酒店門口坐 9 號去盧廉若公園，又係新福利嘅超長陣 Rosa，好悶呀！
個公園冇乜特別，阿苗一路行我一路嗌走。
之後就去附近嘅二龍喉公園坐吊車上松山。
未坐吊車之前我哋去睇咗二龍喉公園隻熊，不過佢匿喺個籠裏面唔肯出嚟，失望。
呢條吊車線自稱係全東南亞最短嘅吊車，亦係馬交唯一嘅鐵路。
今次係我第三次坐，車費亦一次平過一次，
第一次坐 MOP 5， 第二次坐 MOP 3 ，今次 MOP 2。
客量稀少，真係好驚佢摺！
能夠用兩蚊就登上全東南亞最短嘅吊車線，阿苗不禁舉起了勝利嘅手勢。
老實講，架吊車都幾高©@。
每部吊車只可以坐四人，仲細過海洋公園嗰啲。
窗外景色不俗
平安抵達！由於當日冇乜人坐，八部車只開咗三部，其餘五部泊埋一邊冇工開。
之後我哋就行去松山燈塔，發現燈塔下面個防空洞已經開咗俾人參觀，我哋行咗一轉，幾得意。
成個松山燈塔得幾個人，我哋有啲包場 feel。
之後行去禮記冰室，去試吓佢哋出名嘅自製雪糕，行咗好耐，好耐，又行錯………
我哋試咗佢哋嘅三文治雪糕 (MOP 6.0) 同 朱¥j¤O雪糕 (MOP 5.0)，我覺得一啲都唔好食。
食完雪糕之後，沿白馬行行去大砲台，再行去澳門博物館，行到好倦。
入到博物館，我已經冇力行，由得阿苗自己一個慢慢睇，我自己坐埋一邊透吓。
之後就去大三巴做指定動作。
再行返去議事亭前地，已經三點幾。
入咗一間唔知叫乜嘅餐廳，我哋食咗豬潤粥、水蟹粥同白灼粉腸，
MOP 82 埋單，喺議事亭前地食嘢真係幾貴。
之後就喺新馬路等車入氹仔，點知嚟咗架澳巴 21A 去黑沙，我哋兩人二話不說即刻跳咗上車。
車型係澳巴嘅陳年舊車「日慘 Civilian」，
呢款車可以話係全澳門公共巴士車隊中最唔掂嘅車型，又殘又舊又冇力。
不過可以坐吓另一款巴士都唔錯。
21A 嘅客量唔係好掂，沿途上吓落吓，最多只有十個客，
過咗路環市區之後就得番我同阿苗兩個客。
翻查舊記錄，21A 以前係行雙層©@，都唔知點解會搞到今日噤慘淡。
去到黑沙海灘，泳客數目係零，似乎澳門人唔仲意游冬泳。
從黑沙海灘，可眺望遠遠嘅威士汀酒店，感覺佢正，下次一定要住。
15 號巴士係唯一經過威士汀酒店嘅公共巴士，相信亦係全澳門最疏嘅巴士線。
OK，路環叫做「到此一遊」啦。
由於冇乜嘢好行，我哋即刻坐番車出氹仔。
坐嘅係新福利 26A，車型又係超長陣 Rosa，悶！
由於黑沙係冇車兜入氹仔官也街嘅，所以我哋唯有問人喺氹仔邊度落車行入去最近。
無驚無險，我哋平安抵達。
行咗一陣，影吓相，又開始肚餓，所以就去食大利(來)豬扒包。
不過，
大利來冇開，我哋行咗一陣，
見有一間連招牌都冇嘅茶餐廳，裏面有班司警喺度開餐。
「咦？阿 sir 都喺度食喎？」於是我哋即刻入去食下午茶。
原來間餐廳唔係連招牌都冇，只不過我哋為去嗰個係後門，間餐廳叫做「新好利」。
我哋叫咗葡撻、豬扒包、炸魚柳三文治、咖啡同奶茶，MOP 38.5 埋單。
感覺上啲葡撻冇瑪嘉烈蛋撻啲噤好食，個炸魚柳三文治啲魚柳好腥。
我哋離開氹仔嗰時已經開始天黑。
坐澳巴 22 號去三盞燈食晚飯，車型係日野低地台巴士，係今個旅程我坐過嘅最大部嘅車。
三盞燈係舊區，係緬甸華橋居住嘅地方。我哋去雅香粉麵食緬甸麵做晚餐。
緬甸麵係用 spoon 而唔係用 chopsticks 食嘅。好抵食！大大碗都係十二蚊。好好味，不過勁肥。
之後喺附近行吓街市，見到有好有特色嘅街邊燒臘。
之後行番去二龍喉公園坐 9 號返酒店，又係新福利超長陣 rosa …
返到酒店玀番行李，就坐酒店穿窿巴士返碼頭。
見有啲時間，就去碼頭間新八佰伴行咗一陣，點知又俾我哋撞到啲澳門弟兄。澳門真係細。
隨著我哋坐上何生架波音 929，我哋嘅馬交之旅就告一段落。